Jer 28 | NdeIBE | STEP | Ngenyanga yesihlanu yawonalowo umnyaka, umnyaka wesine, ekuqaleni kokubusa kukaZedekhiya inkosi yakoJuda, umphrofethi uHananiya indodana ka-Azuri, owayevela eGibheyoni, wathi kimi endlini kaJehova phambi kwabaphristi labantu bonke:

Jeremiah 28

UHananiya Umphrofethi Wamanga

1 Ngenyanga yesihlanu yawonalowo umnyaka, umnyaka wesine, ekuqaleni kokubusa kukaZedekhiya inkosi yakoJuda, umphrofethi uHananiya indodana ka-Azuri, owayevela eGibheyoni, wathi kimi endlini kaJehova phambi kwabaphristi labantu bonke:

2 “UJehova uSomandla, uNkulunkulu ka-Israyeli uthi: ‘Ngizalephula ijogwe lenkosi yaseBhabhiloni. 3 Phakathi kweminyaka emibili ngizazibuyisela kule indawo zonke izitsha zendlu yeNkosi uNebhukhadinezari inkosi yaseBhabhiloni azithatha lapha wazisa eBhabhiloni. 4 Ngizambuyisela kule indawo futhi uJehoyakhini indodana kaJehoyakhimi inkosi yakoJuda kanye labanye bonke abathunjwa koJuda baya eBhabhiloni,’ kutsho uJehova, ‘ngoba ngizalephula ijogwe lenkosi yaseBhabhiloni.’ ”

5 Umphrofethi uJeremiya waphendula umphrofethi uHananiya phambi kwabaphristi labantu bonke ababemi endlini kaJehova.

6 Wathi, “Ameni! Sengathi uJehova angamenzenjalo! Sengathi uJehova angagcwalisa amazwi owaphrofethayo ngokubuyisela kule indawo izitsha zendlu kaJehova labo bonke abathunjelwa eBhabhiloni. 7 Lanxa kunjalo, lalela kulokhu engikutsho lawe usizwa kanye labantu bonke besizwa ukuthi: 8 Kusukela ezikhathini zakuqala abaphrofethi abandulela wena lami baphrofetha ngempi, ngomonakalo langesifo emazweni amanengi lasemibusweni emikhulu. 9 Kodwa umphrofethi ophrofetha ngokuthula uzakwaziwa njengothunywe nguJehova sibili lapho ilizwi lakhe seligcwalisekile.”

10 Lapho-ke uHananiya umphrofethi wasusa ijogwe entanyeni kaJeremiya umphrofethi walephula, 11 wasesithi phambi kwabantu bonke, ‘UJehova uthi: Ngizalephula kanjalo ijogwe likaNebhukhadinezari inkosi yaseBhabhiloni ezintanyeni zezizwe zonke phakathi kweminyaka emibili.’ ” Ngemva kwalokho umphrofethi uJeremiya wasuka wazihambela.

12 Masinyane nje emuva kokuba umphrofethi uHananiya ephule ijogwe entanyeni kaJeremiya umphrofethi, kwafika ilizwi likaJehova kuJeremiya lisithi: 13 “Hamba uyetshela uHananiya uthi, ‘UJehova uthi: Wephule ijogwe lesigodo, kodwa esikhundleni salo uzakuba lejogwe lensimbi. 14 UJehova uSomandla, uNkulunkulu ka-Israyeli uthi: Ngizabeka ijogwe lensimbi ezintanyeni zezizwe zonke lezi ukuba zisebenzele uNebhukhadinezari inkosi yaseBhabhiloni, zizamsebenzela. Ngizamnika amandla laphezu kwezinyamazana zeganga.’ ”

15 Umphrofethi uJeremiya wasesithi kuHananiya umphrofethi, “Lalela, Hananiya! UJehova kakuthumanga, kodwa usuwenze isizwe lesi sathemba amanga. 16 Ngakho, uJehova uthi, ‘Sekuseduze ukuthi ngikususe ebusweni bomhlaba. Ngawonalo umnyaka uzakufa, ngoba uphrofethe ukuhlamukela uJehova.’ ”

17 Ngenyanga yesikhombisa yalowomnyaka, uHananiya umphrofethi wafa.